Биографија
Марта Димитров е родена на 17 февруари 1991 година во Кавадарци. Основното и средното образование ги завршува во родниот град, дипломира преведување по англиски и германски јазик на Филолошкиот факултет „Блаже Конески“ во Скопје, а во 2024 магистрира на насоката Меѓународен бизнис со странски јазици на Универзитетот ФОН. Пишувањето ѝ е страст од рана возраст, а реализирањето на нејзините прозни и поетски дела во печатена форма е остварување на нејзиниот сон. По дипломирањето интензивно пишува поезија на англиски јазик, која ја објавува на својот блог, а паралелно го пишува романот „Разголена душа“, кој го издава во 2018 година. Истата година, откако нејзината поезија е одлично примена од јавноста на друштвените мрежи, ја издава и стихозбирката „Мојот храм е внатре во мене“. „Шардоне и шпагети карбонара“ е нејзиното најново прозно дело кое набрзо по првото издание го доживува и второто. Во овој роман, за разлика од нејзиното првенче освен на приказната обраќа внимание и на неговата структура со што Димитров покажува дека зрее како автор. Таа и понатаму работи на нови прозни содржини, не заборавајќи ја и поезијата без претензии да ги печати песните кои повремено ги пишува.
